November 5, 2010

SMS Forwarder

       Tunlai chu ka blog ka khawih khât lutuk a, November, mahni pian thla te a lo ni leh ta bawk a,engemawni tal chu han update ve leh zeuh teh ang...hehe..

       Tunlai ka rilru-a awm pakhat, SMS in forward (luih)tir lam pang. Thawkkhat lai deuh a ka SMS dawn:

       "Pathianin ka lo kal leh thuai dawn a ti. He thu hi mi 15 hnenah thawn ang che. Tichuan kar khat chhungin i thil tih tumah hlawhtlinna i chang ang. He thu hi midang hnena i hrilh chhawn loh chuan kum 5 chhung pawhin i thil tih tumah hlawhtlinna i chang thei lo ang. He thu hi St. Thomas church, Kerela atranga rawn kal a ni. Tichuan he thu hi a rang thei ang berin midang hnenah hrilh chhawng ang che. Pathian hai der suh ang che. Pathianin malsawm che rawh se."

       He thu hi ninawm khawp mai hian ka dawng mawlh mawlh mai a, ka thriante leh ka chhungte khan mamawh min ti viau ni ngei tur a ni. Mahse ka han ngaihtuah chiang thrin a, Pathian lokal leh thuai tur thu midang hnena thawn chhuah kha chu a thrat viau rual khan a thu dang rawn ken tel ber khan ka rilru a pawt peng ta daih mai a. Ka dawn tirh takah kha chuan keia hnial hrat ve ta hrim hrim khan min rawn thawn tu apiang hnenah khan "Pathianin ka lo kal leh dawn a ti lo, Lal Isua zawkin a lawm ti", te ka lo ti fiam vel thrin a. A thu dang rawn ken tel ber ka'n ngaihtuah thrin, ka thil dawn hi ka thawn chhuah(forward) leh chuan ka thil tih tumah kâr khat chhungin hlawhtlinna ka chang dawn a ni. Mahse ka SMS dawn hun lai ber kher hi kan exam chawlh lai, engmah han tih tum em em pawh nei chuang lo a ka awm vel mai mai lai ber kher a ni bawk si, thawn chhawng lo ila, kum 5 chhung hlawhtlinna ka chang thei dawn bawk si lo. A awihawm loh em mai han ti dawn ila Pathian hming te lai lai a rawn ri tel bawk si. A va han luhaithlak tehreng em. Ka awihloh em avang chuan "Duh leh Pathian tih tak tak a nih chuan hrem ka ngaih tâk leh min hrem mai rawh se", ti chungin ka thawn chhawng ta lo ngei. Tun thleng hian dam tak chuan ka thil tih tumah hlawhchhamna chu ka la tawng zui ta lemlo chu a nia.

       Hei chauh lo pawh hi hetiang chi SMS hi a Mizo trawng ang te, a Saptrawng ang zawng te pawhin ka dawng hnem ta malh malh khawp mai. "Lal Isua hi i tan leh ka tan a thi a ni. He thu hi zaninah mi 15 hnena i thawn chuan naktuk zingah thu lawmawm tak i dawng ang" tih angreng vel, thawn chhawn a a lawmman thra tak, mahse thawn chhawn loha a hremna na tak tur ang chi hi ka dawng ka dawng leh thrin. Pathian hming meuha rawn thawn a ni thrin bawk si, inthiamlo deuh trung chung hian ka ngaihsaklolui(ignored) vel ta mai mai zel a. Hetiang hi tu pa tho â rilru puak chhuak ngaihtuahna vel nge niang aw ti te'n ka ngaihtuah kual vel ta zel a, chuta ka ngaihtuah chhuah tâk leh midang pawhin lo ngaihtuah ve ula ka tih tâk chu :

1. He SMS hi ka thawn chhawn loh avang hian vanduaina ka chungah a tla dawn kher lo.
2. He SMS ka thawn chhawn avang hian hausakna te,thu lawmawm tak te ka dawn phah dawn bawk hek lo.
3. He SMS ka thawn chhawn avang hian ka currency(balance) hi Cheng khat paw'n a pun phah dawn lo.
4. He SMS ka thawn chhawn avanga hlawkna tel tu chu Service Provider ho bak an ni chuang lo.
5. He SMS hi midang hnenah thawn chhawngin midang rilru nuamlo leh inthiamlo trung turin ka siam dawn lo. Pathian hian ka nunah hetiang em em a thu a rawn sawi duh tak tak chuan, ka Cellphone a rawn hman hma hian kan in kawta hnimbuk te pawh hi a rawn alh ve hluai zawk mahna.
6. He SMS min rawn forward tupa/tunu ngaih ang em em hian ka Mawl leu!!!..

       Aw le, a tawp nan, tuna a chunga point paruk ka rawn pek tâk te hi ngun takin chhiar chhuak vek la, i by-heart vek hnu-ah midang 6 hnenah tal i thawn chhawng dawn nia. I thawn chhawn loh chuan thla dêt leh hmasak berah i kua a thralo hrim hrim ang...ahahhahahahahahhaaha :) :)) :D lOlxxxxx....huhuhu..

10 comments:

Blind Dayze said...

Ekhai Thingrem chu update zel rawh.. post khat deuh mahla tha vek....

Khitiang message khi keipawh ka thian "mi pangngai" :-) anga ka ngaih ve te hian min rawn thawn leh kurh zela a zia lo thei khawp mai..

bhruai_tea said...

@Blind Dayze, nia tran ka'n la thar ve leh deuh ang e, rinaiin blog lamah a lo thahchhiat theih khawp mai..

Anonymous said...

he thil hi keipoh ka dawng zing mai a.a ho ho ka ti lutuik tlat.....i ziak tha khawp mai.........

Xauz said...

keipawh ka dawng fo.. ka dawn rual, chhiar zawh hma hian ka delete daih zel..

Maisek said...

keichu, eng atan mah ka ngai lova, ka thawn chhawng ngai bawklo! I titha e!

CyberThug said...

Tha khawp mai. I point 6 te khi ka pa chhiarah kan copy teh ang. A forward pup pup thin a, a hrilh fin theih tlat loh :)

caribou said...

Hman deuh khan hetiang SMS hi ka dawng ve tawh thin a, a tir lam kha chuan thahnemngai takin ka thawn chhuak ve thin. A hnu lamah chuan ka delete hmiah hmiah. Hetiang ang chi ah hian a hlawkna teltu chu network provider te chiah an ni.

Anonymous said...

kei chu ka hlau thin a a tirah..mahse ka hlau toh lo..delete hmiah hmiah zel

burgerstud2005

Anonymous said...

a tha khawp mai,hetiang chi sms hi ka haw khawp mai..ka delete hmak zel.

udoplhgagen said...

Las Vegas Convention & Sports Book - JAMH Hub
› entertainment › entertainment Nov 2, 2021 통영 출장안마 — Nov 2, 2021 Located at Wynn 이천 출장안마 Las Vegas and 안산 출장마사지 The LINQ Promenade, the first-ever casino and resort on the Las Vegas Strip, 여주 출장마사지 Wynn is a true locals destination. The 세종특별자치 출장안마

Post a Comment