November 5, 2010

SMS Forwarder

       Tunlai chu ka blog ka khawih khât lutuk a, November, mahni pian thla te a lo ni leh ta bawk a,engemawni tal chu han update ve leh zeuh teh ang...hehe..

       Tunlai ka rilru-a awm pakhat, SMS in forward (luih)tir lam pang. Thawkkhat lai deuh a ka SMS dawn:

       "Pathianin ka lo kal leh thuai dawn a ti. He thu hi mi 15 hnenah thawn ang che. Tichuan kar khat chhungin i thil tih tumah hlawhtlinna i chang ang. He thu hi midang hnena i hrilh chhawn loh chuan kum 5 chhung pawhin i thil tih tumah hlawhtlinna i chang thei lo ang. He thu hi St. Thomas church, Kerela atranga rawn kal a ni. Tichuan he thu hi a rang thei ang berin midang hnenah hrilh chhawng ang che. Pathian hai der suh ang che. Pathianin malsawm che rawh se."

       He thu hi ninawm khawp mai hian ka dawng mawlh mawlh mai a, ka thriante leh ka chhungte khan mamawh min ti viau ni ngei tur a ni. Mahse ka han ngaihtuah chiang thrin a, Pathian lokal leh thuai tur thu midang hnena thawn chhuah kha chu a thrat viau rual khan a thu dang rawn ken tel ber khan ka rilru a pawt peng ta daih mai a. Ka dawn tirh takah kha chuan keia hnial hrat ve ta hrim hrim khan min rawn thawn tu apiang hnenah khan "Pathianin ka lo kal leh dawn a ti lo, Lal Isua zawkin a lawm ti", te ka lo ti fiam vel thrin a. A thu dang rawn ken tel ber ka'n ngaihtuah thrin, ka thil dawn hi ka thawn chhuah(forward) leh chuan ka thil tih tumah kâr khat chhungin hlawhtlinna ka chang dawn a ni. Mahse ka SMS dawn hun lai ber kher hi kan exam chawlh lai, engmah han tih tum em em pawh nei chuang lo a ka awm vel mai mai lai ber kher a ni bawk si, thawn chhawng lo ila, kum 5 chhung hlawhtlinna ka chang thei dawn bawk si lo. A awihawm loh em mai han ti dawn ila Pathian hming te lai lai a rawn ri tel bawk si. A va han luhaithlak tehreng em. Ka awihloh em avang chuan "Duh leh Pathian tih tak tak a nih chuan hrem ka ngaih tâk leh min hrem mai rawh se", ti chungin ka thawn chhawng ta lo ngei. Tun thleng hian dam tak chuan ka thil tih tumah hlawhchhamna chu ka la tawng zui ta lemlo chu a nia.

       Hei chauh lo pawh hi hetiang chi SMS hi a Mizo trawng ang te, a Saptrawng ang zawng te pawhin ka dawng hnem ta malh malh khawp mai. "Lal Isua hi i tan leh ka tan a thi a ni. He thu hi zaninah mi 15 hnena i thawn chuan naktuk zingah thu lawmawm tak i dawng ang" tih angreng vel, thawn chhawn a a lawmman thra tak, mahse thawn chhawn loha a hremna na tak tur ang chi hi ka dawng ka dawng leh thrin. Pathian hming meuha rawn thawn a ni thrin bawk si, inthiamlo deuh trung chung hian ka ngaihsaklolui(ignored) vel ta mai mai zel a. Hetiang hi tu pa tho â rilru puak chhuak ngaihtuahna vel nge niang aw ti te'n ka ngaihtuah kual vel ta zel a, chuta ka ngaihtuah chhuah tâk leh midang pawhin lo ngaihtuah ve ula ka tih tâk chu :

1. He SMS hi ka thawn chhawn loh avang hian vanduaina ka chungah a tla dawn kher lo.
2. He SMS ka thawn chhawn avang hian hausakna te,thu lawmawm tak te ka dawn phah dawn bawk hek lo.
3. He SMS ka thawn chhawn avang hian ka currency(balance) hi Cheng khat paw'n a pun phah dawn lo.
4. He SMS ka thawn chhawn avanga hlawkna tel tu chu Service Provider ho bak an ni chuang lo.
5. He SMS hi midang hnenah thawn chhawngin midang rilru nuamlo leh inthiamlo trung turin ka siam dawn lo. Pathian hian ka nunah hetiang em em a thu a rawn sawi duh tak tak chuan, ka Cellphone a rawn hman hma hian kan in kawta hnimbuk te pawh hi a rawn alh ve hluai zawk mahna.
6. He SMS min rawn forward tupa/tunu ngaih ang em em hian ka Mawl leu!!!..

       Aw le, a tawp nan, tuna a chunga point paruk ka rawn pek tâk te hi ngun takin chhiar chhuak vek la, i by-heart vek hnu-ah midang 6 hnenah tal i thawn chhawng dawn nia. I thawn chhawn loh chuan thla dêt leh hmasak berah i kua a thralo hrim hrim ang...ahahhahahahahahhaaha :) :)) :D lOlxxxxx....huhuhu..
Chhiar zêl dawn???

March 18, 2010

Min Hmangaih Ve Reng Rawh Aw..

Kum 1923 daih tawh kha a ni a. Keichu kum 15 mi lek la niin, he hringnun kawng bumboh takah hian an sawi 'Hmangaihna' hi engang fakaua ropui leh hlu a nih dan tawng chhoa, la hrethiam ve chhawm turin hmachhawp ka nei tran ve êk êk chauh a la ni.

Ka pu:
     Ka pi leh pu, ka pa nu leh pa te nena chengho kan nih avang hian ka pi leh pute hi ka ngaina hle a. A bik takin ka pu nen hian kan inkawmngeih em em a. Ka nausen tetlai atrang tawh a min chhawnchhaih peih em em leh min duat em em thrin tu a ni a. Kei naupang harh ve nafam chu mi pawi lo sawi palh changte alo awmlo theilo a, chutiang dinhmun buaithlak leh khirhkhan tak tak ka tawn chang pawh a ka tlukluhna kulhpui hmasa leh ka humhimna lungpui nghing ngailo chu ka pu ngei chu a ni.
     Tar a nih tawh avanga hnapui thawk thei ta lo chu, in nghaktu ber a ni reng mai a. A in nghahpahte chuan a tupa, naupang khawlai nuamtimi ve tak tan lehkhachaihte lo siamin, tlai ka sikul banah kan in hnunglama zawl zaupui awmah chuan lehkhachaih chu kan chaih dun thrin a. Nuam ka ti thei em em thrin.

Lehkhaphekte:
     Ka pu chuan a kawrchung ipte chhungah hian lehkhaphekte, thil engemaw inziahna hi a dah thra a. Chu lehkhaphek chu a roh em em mai lehnghal. Laksak han tum der chhin mai mai pawh hian kan tihchhiat hlau hian min hauh phah fo reng thrin. Lehkhaphekte mai mai si, chuti fakau maia a roh tak em em mai chu engtak ni ang maw tiin kan inrinsiak laih laih thrin.
     Tukkhat erawh chu ka pu chu nidang anglo tak maiin a lungngaih hmel em em mai a. A hmelah chuan nidanga a hmel hlim sarh thrinte chu a chuai zo a,hlauhthawnna leh lungngaihna hmel a zam ngiai mai a. A hmangaih, a nupui, ka pi, hun engemawchen natnain a tlakbuak tawh, damlo chau tak bulah chuan a thru a. Duat takin a sam te chu a'n chulsak leh hleuh hleuh thrin a. Tichuan a tupa kei ber kher chu min rawn ko a. A bul ka va thlen chuan kei naupang mai chuan han hnem vel vak ngaihna ka hriat si loh avangin a bulah chuan ka'n dingzum zul ringawt phawt a. Chutah a kawrchung uk, hlui lampang tawh tak ipte chu a zen rek rek a, a lehkhaphekte, a roh em em mai chu a rawn phawrh chhuak ta. Chheile!!! Eng thu tak han inthaikawi trial vel ang maw...

Phek ropui thawnthu chu:
     Ka pu chuan a bula thru turin mi han ti a, ka dara min kuah pah chuan,"Bawiha, ila naupang deuh a, tunah chuan ila hrethiam kher rihlo maithei a, mahse engtikah emaw chuan ila rawn hrethiam chho ve mai ang chu", tih pahin chumi lehkhaphekte thawnthu chu 'tiang hian min hrilh ta a:
     "Tlangval hrechho rual ka nih chuan, chhungte thlazar hnuai atranga tal hrang vein, mahni hmakhua ngaihtuahin hna thawh tur ka han zawng ve a. Vanneihthlak deuh maiin kan khuaa pa neinung ve tak pakhat hian a farm enkawltu pakhat atan min la ve hlauh mai a. A hlawh chu tam tham tak nilo mahse mahni puala sum thawkchhuak a, chhungte tibuailo a ka awm thei chu ka lawm tawk ve rih khawp mai.
     Mi te chuan hlawh tamtak neiin eisenloh, an tu leh fate thleng pawha chen dak theihloh khawpa tam sum leh pai an thawkchhuak ngei ang. Kei erawh chuan ka nitin hlawh hi ka nitin hrawk chawm nan hian ka daih tawk trawng trawng a ni chauh si. Chutiangang dinhmuna ding ka nih avang chuan nupui neihte chu a tum hian ka tum ngamlo mai pawh a ni lo, rilru-ina a duhthawi ve deuh takngial pawh hi ka mitsir ngam manglo a ni ber mai.
     A aia thra leh ropui chan leh chuang tur ka hriat loh vang pawh ni fahmiang, ka thawhnaah chuan ka tuichilh em em mai a. Chuvang chuan min ruaitu ka pu te pawh chuan min duhsak ve em em a. Rei vaklo hnuah phei chuan hnathawk dang te enkawl turin,an hotuah hial min siam ta a".

Hmangaihna mak mawi leh duhawm:
     "Kan beisei loh leh rinphak bak hian mihringte chungah hian a thleng ve leh fo thrin a. Ka chungah pawh dan rual lohin a lo thleng ve reng mai. Nikhat chu kan farm neitupa fanu, ramdanga lehkha zira awm alo haw a. An farm chu fan a chak avangin a pa chuan fanpui turin min ti a. Farm a rawn thleng a, chu nula ka han hmu chiah chu....chheirawle!!! a va han hmelthra chungchuang ngai tak em. A vun rawng ngo no set mai leh a bahsam rangkachak rawng inkap eng sat te chu ava han inchawih ngai tak em. Chumai a ni 'nem. A heh, Rose par sen lar ang mai a sen hlar mai leh a mitmeng dumpawl riai mai han hmuh ringawt mai pawh chuan, ramchhuak chhawlhalin luite tuithiang tak mai an hmu ang maiin hringnun tuihal a thawi dam nghal sawng sawng mai. 'Love at first sight' tihte hi a awm ka lo rin ngailoh avang ringawt te chuan ka inthiamlo lek lek ta mai.
     Farm kan fan chhung zawng pawh chuan thildang ka ngaihtuah thei tawh lo. Mit tlalo lekin amah bawk chu ka lo melh leh vawng vawng thrin. Ka thinlung mit phei hi chu a pawng zawrh zawrh a ni ber mai. Ka thinlung zawng zawng hian ka duhin ka ngaizawng nghal ta em em mai a. Rilruah ngaihtuahna hrang hrang a rawn lut nghal. Aw, rem nise, hmangaih biahthu han hlan a, duh tak maia han pawm a, han kuah a, han fawh vawng vawng....aaa.... hrawk bawk dawk zawk khawpa han fawh ngawih ngawih mai te pawh a chakawm rum rum mai a lawm le. Kei ka tan zawng cho zawh rual a ni si lo, engtinnge ka tih ang? Tihngaihna dang vak keia dinhmun atrang hi chuan ka hre si lo. Englekhawle, chunglamah Engkimtithei a awm alawm maw le. Dil leh chawt phawt mai teh ang.
     Lalhmelthra-i chu farm lam ngaina mi tak a nih avangin farm chu a rawn tlawh ve fo a. Hun rei vaklo hnu chuan kei nen pawh chuan kan innel chho ve hle tawh a. A hmel a thrat tluk bawkin a rilru pawh thra tak a ni. Farm a rawn kal changte chuan a titi siam siam reng a. Kei phei chuan ka ngaina satliah mai pawh a ni lo, ka ngaizawng takzet tawh mai. Nghalchang kawlh tai a hlawh tur pawh ni se ka ngam zan ang. Min tai duhlo a nih pawhin keimah talin ka va tai tralh duh hial ta ve ang.
     Ka duh em avang chuan Pathian hnenah pawh ka dil awl lo mai. Thla tam pawh a la ral hman lo, ka dilna chhanna duhawm chu a rawn thleng ta der mai. Tlaikhat chu farm-a tlai ni nema kan pahniha kan lenkhawthawn vel mai mai lai chuan, a ding a, ka mitah tak min melh sat pah hian, thutak deuh maiin a rilru-a ka awm reng thrin thu leh min duhzia min hrilh ta tlat mai a nih kha!!! Farm a rawn tlawh ngun em em chhan te pawh keimah vang liau liau a ni tih min han hrilh mai te phei chu, ka mithmuh leh benghriat te chuan rinhlehna ramah min hruailut thei rum rum dawn a lawm le. Mahse han awihloh phal chi ziazang ni hek lo. Ka lawm lutuk chuan hnuk ulh treuh a "Jakoba Peter" han tih tuarh mai te ka chak rum rum hman a, mahse awmzia a neih loh avangin ka insum leh hram hram. Ka awihloh lutuk avanga awih zawk nge ka nih a, ka awih lutuk avanga awih lo zawk ka nih pawh ka hrethiam chiah lo. Ka lawm em em  a ni tawp mai.

Hmangaihna lamtluang bumboh:
     Fairy Tales anga 'Tichuan hlimtakin an awm kumkhua ta a' tih anga tawp mai tura ka duh em em lai chuan, thil duhawmlo zet mai, mumang ram lamah pawh ka la duh chhin ngai miahloh tur thil a rawn thleng leh ta tlat. Chutia kan han inkawm nasat deuh hnu chuan le tlema mi chawhnu deuh tan lo chuan kan pahnih inkara inzawmna awm chu hairual ni ta hek lo, a nu leh pa te pawh chuan an lo hre ve ta. An lawm miah lo zui lehnghal. A pa phei chuan makpa atan Doctor emaw Officer neinung deuhte a lo beisei ve ran ran lai a chutia a fanu rangkachakin a huanpu mai a lo tleipui reuh chu a ngaihdan a pel viau ni ngei tur a ni, kan inngaizawng tih a hriat atrang chuan kei min hmuh chu a khapsak ta bur nghal mai. Keiin ka hna ka chan phah bawk.
     Chutia kan inhmuh hleihtheih tak si lohah chuan khua hi a har ngawih ngawih mai a. Tlaikhat chu a chhungte hriatlohin a rawn chhuak ru a, kan in lamah a rawn kal a. Kan han inhmu chiah chu kan inngai ngang bawk a, lawm avang hian mittui a luang zawih zawih thei. Kan han inpawm vawng vawng phawt a. A chhungten kan inhmuh an remtih si loh avangin kan hmalam hun tur relin kan han Committee nghal a. Mi pahnih, duh thuhmun Committee kan ni bawk a, kan agenda 'Tlandun' chu kar loah kan rel thlu nghal thuai mai a. Kan tlandun dan tur chu kan rel leh nghal a. Kan khaw daia Forestation Department ho Fartruah hmunah chuan kan innghak dun anga, chutah kan khaw threnawm hnaiber khua kan pan ang. Chutah chuan kan innei anga, tichuan tuma tihbuai tawh loh turin hlim takin kan awmdun tawh dawn a ni.

Phek ropuia thu inziak chu:
     Tichuan chak angreng tak si, huphurh ru deuh bawk siin kan ruatlawk ni-ah chuan kan intiamna hmun chu ka va pan ta a. Mahse ka va thlen chuan ka tiampuinu-i reng hmuhtur a lo awm lo mai. Ka rilru beidawng ka hawi vel ruai lai chuan ka piah hret Fartruah kung upa ve tawh takah chuan lehkha lo inkilhbet vau vau ka va hmu hlauh a. Ka pan phei a, ka'n pawtthla a. Ka chhiar nghal. Ka hmangaihi, helai hmuna ka tiampui thuziah ngei mai a lo ni. Hetiang hian a lo ziak a:
     'Ka duhlai, kan tiam hmun chu kei aia ilo va thleng hmasa a nih pawhin,
      Lo beidawng lo hram ang che aw.
      Hna chhete tih zawh lawk tur ka la nei a;
      Engtianga rei nge a nih dawn erawh ka hre lo.
      Mahsela englaimahin ka thlauthla ngailo ang che.
      Intawn leh hma zawng leh hlimtaka kan lendun thlengin,
      Keichuan ka hmangaih reng fo ang che.
      Nangpaw'n Min Hmangaih Ve Reng Rawh Aw.'  ..."

Thawnthu ropui tawpna chu
:
     Khi thu ropui khi ka chhiarna chu ka pi boral hma darkar khat kalta lek kha a ni a. Khatia an tlandun hnu khan inneiin, chhungkaw hlimtak an dinchho dun a. Inhmangaih leh inngai em em rengin tar tak thlengin an dam dun a. Mahse hun engemawti atrang khan ka pi hriselna chu a thralo chho ta angreng a. Damdawiin lamah te kan inenkawl fe hnuah, inlamah kan insuan leh a. Thla thum vel zet natna khuma a beh hnu chuan, ka pu-in he khawvela a hmangaihber mai leh keini, a tu leh faten kan ngaih em em mai chuan chatuan ram min lo pansan ta.
     Ka pi vui ni chuan Biakin lamah kan kalkhawm a. Ka pu hi mi inti pachang thei mi zet mai a nih avang hian kum sawm leh panga ka nih chhung hian a mittui tla hi vawitekhat pawh ka la hmu chhin ngai lo. Mahse hemi ni zet hi zawng, hringfate doral trihbaiawm tak 'THIHNA'-in a hmangaih a hnehchhuh ni a ni tlat a, ka pu mittui chu dan rualloh hian a sur zung zung mai. Biakin kawngkapui kianga trawngtraina hmun an siamah reilote kan trawngtrai hnu a ka pu-in ka pi hnena a thuchah hnuhnungber leh rinawmna thutiam a sawi lai chuan mittui sur lo reng kan awm lo:
     'Ka duhlai, kan tiam hmun chu kei aia ilo va thleng hmasa a nih pawhin,
      Lo beidawng lo hram ang che aw.
      Hna chhete tih zawh lawk tur ka la nei a;
      Engtianga rei nge a nih dawn erawh ka hre lo.
      Mahsela englaimahin ka thlauthla ngailo ang che.
      Intawn leh hma zawng leh hlimtaka kan lendun thlengin,
      Keichuan ka hmangaih reng fo ang che.
      Nangpaw'n Min Hmangaih Ve Reng Rawh Aw...'
Chhiar zêl dawn???

February 18, 2010

Nui Hiau-in..Tunlai ka SMS dawn threnkhat..

Tunlai chu Aizawl lamah Airtel ho SMS pack a tlawm thar ve viau a ni awm a.Thriante ho hian Forward message hi min rawn thawn nasa thei hlawm khawp a.Tam tak hi chu fiamthu nuihzatthlak tak tak, keimah pawhin ka hlimpui tak tak te an ni hlawm a.A thren thren blog lamah ka'n rawn tarlang ve mai mai ange.

**Nichin deuh hlek khan Mamitah Pu Sawma(Driver), Kum 30 mi Motor khalh lai chuTuikuk hel ni ngeia rin ten kawngchhak atrangin "Tlanchak deuh rawh" an ti.
**Exam Kalphungte: 1)A chhuah har chuan chhuah hma tur. 2)Question-in min bum chuan bum ve ngei ngei tur. 3)Thuhriltu Bung 1 Chang 18 chhiar tur. 4)Question kan hriatthiam loh chuan kan chhanna an hrethiam bik tur a ni lo.
**Grammar zirna: Verb=Thiltih sawina. Eg:Thanga'n Puii a Verb.
**An nula rim kha a Pa a strict lutuk a,zan dar 12 velah an sitting room-a an pangpar lem khawi te kha tui a rawn pe vel.
**A tlangpuiin hnapkhir kheuh lai hian melh ngai an melh a,an ngawi reng zel. Hnapkhir hian Mit leh Lei a control a niang.
**A inawhhlumna tur hrui kha a sei lutuk a, tukverah te a dak vel mai mai.
**Sipai 4000 rual Medical check-up an nei a, a ruala an thil an han lip tir mai chu a pui khawp mai. A vul hian a vul chuk mai. Anthurium par ang mai a ni e...zu han ti a.
**Thufing: 1)Nakina i tihtur ti lawk duh suh, tih kher a trul lo thei. 2)Tawlhthluk i china hrehawm i tih viau chuan sim daih rawh. 3)Motor khalh laiin Zu in suh, i tibua anga, a uiawm.
**Pa pakhat zahmawh sawi hrat lutuk pawh kha Doctor hnenah a inentir a, Doctor chuan a na lai a zawt a, ani chuan Ka Sazu zawn chho ka hrawk hi a ti deuh kher.
**Mothar pakhat hmelchhe lutuk pawh a pasal te ina a lawi luh niin a pasal nu chuan an Calendar ah 'Vawkte lak ni' tiin a chhinchhiah vel
**Hmangaihnaiin a hliam tawh mihring chu lungngai em emin an nui a. Beidawng tak chungin khawvelin hmalam a panpuia, thi chungin an dam ve hram hram a. Mittui nen, hnaptui nen...A tawpah chuan an hritlang leh nge nge thrin.
**Ramtiam lam panin..chaklo tak chungin,Nitin ka kal a........
...
...
...
Chau thei rapz...
**A mothar tukah chaw ei laiin an pa hnenah "Ka rinai daihin i zang" te a ti vel.
**Chakai an khawrh a,an rin aiin a lo vang a.Lung lian tawk pakhat an phawk a,tereuhte alo tawm ker a,an beidawng lutuk chuan "Mama, khawnge i chhungte" an ti tawp.
**Nula zeilo dairy: Aug 1: Zaran min rim.
                             Aug 2: Zaran min rim.
                             Aug 5: Zaran min rim.
                             Aug 12: Zaran min rim.
                            Aug 20: Zaran min rim.
                            Sept 5: Zaran mi rim.
                            Sept 12: Zara te inneih naah ka fatu!!!...
**Pastor pakhat nupui nei hlim poh kha fa neih hmelthrat loh kha a'n hlau mai mai khawp a. A nupui a mutpui zawh veleh hian annu something a hupsaka, "Lalpa'n malsawm rawh se" a ti ziah.
**Isua hnenah khan mitdel kutdawh Bartimaia khan "Isu,Davida fapa, min khawngaih rawh" tiin Isua khawngaihna a dil a.Isua khan a khawngaih asin aw.
**Question to Miss Mizoram:
"Virginity hi enge i ngaihdan?"
"Awii, na ka ti lutuk!!...".
**Tlangval pakhat bike accident pawh kha a vannei khawp mai,meter 30 vel lai a lum a,a na miah lo,a phurthak ringawt.
**Rawn call che ka tum a,mahse i buai ang tih ka duhsak che a, i hman veleh rawn call ngei che ka beidawng..A chhanchu engtizia??..
**Nula pakhat pawh khan a bialpa bulah 'Suihlungleng' hi chu a tihdan dan hi a la awm a, mahse 'Serhlungleng' zet hi chu a hrehawm ngawih ngawih zu han ti a.
**Naupang tereuhte pakhat hian a nau trap alo thlem ve a, "Mate, trap tawh suh, apu-in a seh mai tur che nia..".
**Nula pakhat damlo pawh kha a mu peih tawh si lo, a thru peih bawk si lo, a ding peih bawk si lo, han thawha han vei kual vel a peih bawk si lo. Tihngaihna a hrelo lutuk a, a awm vel ta mai mai ringawt.
**An awmpui nula mawlmang ve tak khan Fridge-ah khan lehkhabu a lo remkhat tlat mai a. Pa-ber tihngaihna hrelo lutuk chuan, "Pawilo,tikhan khawlum huna chhiarah a ni tawh mai" zu han ti ringawt pek a.

 Huizzz...ala tam lutuk..ka peih tawh lo...peih leh hun atan ni tawh mai teh se.. Ka lawm e..
Chhiar zêl dawn???

December 5, 2009

Khrimas pawh a Mas thei tak tak lo..

        Engineer zirlai tam zawk tan chuan exam hun a lo ni leh dawn ta mai..Krismas lai ber khera kan han exam thrin hi chu aw..Lehkha zir ngai bawk nen lung pawh hi a leng hleithei meuh thrin lo a nih hi maw.

        Kan kumtin dan a ni bawk a,ngaiah chuan kan neih chho ve zel chu ni awm tak chu a nia..Amaherawh chu ka ngaihtuah thrin a Kristian te hunpui bawhpelh buai kher lo a tih dan hi chu a awm a sin maw le aw..Hindu ho hunpui-ah te pawh a kar a kar te kan chawl thrin tho si a.India ram sakhaw zalenna ramah hi chuan a fair lo ve deuh chu ka ti thrin.Kumin kan College-ah Good Friday-a class kal tur tih kan Principal thuchhuah Notice Board-a a lo intar va ka hmuh te phei kha chuan rilru chu a na ve duh khawp.Complaint a nasat em avangin kan kal lo ta chauh kha a nia.

        Krismas hi engtinnge Mas tawka ka hman theih ang.He hunpui lo thleng ka hmandan turah hian engtianga ka hman hian nge Krismas hi ti Krismas ber ta ang le.Exam lai te a nih dawn avangin Naupiang lawma han chet ve vak emaw kha a rem meuh dawn si lo.Naupan lai te kha chuan thlasik khawvawt hnuaia han inrallemchan te,inbihruksiak te,a tam mai..Khang ho zawng zawng te kha kan tan chuan Krismas ti Masi ber tu leh kan nghahhleh ve chhan ber te kha a ni thrin a.Tlema kan han len ve deuh hnu te kha chuan lenkhawm/zaikhawm nuam timi tak ka nih avangin kohhran programme a Krismas zaikhawm naah ka tel tam vein,nuam pawh ka ti viau thrin a,khangte kha ka tan chuan Krismas ti Masi tu a ni leh ta zel a.

        Tunah chuan tunah chuan...Kan hun tawn a zir zelin Krismas ti Masi tu pawh a dang ve zel chu a ni si a.Tunah chuan exam hun a nih chhoh dawn avang hian thra taka lehkha zir hi Krismas ti Masi tu atan ka hmang thei ve mai angem?..a har awm reuh...

        Tihian ka ngaihtuah ta a.Krismas hi Masi taka hmang tur chuan ka rilru hi a pawimawh ta.Kan tana Lal lo piang hi thinlung takin lawm ila.Thil dang zaikhawm etc te kha chu lo dah thra rih ta mai ila(a thralo ka tihna ni loin,zaikhawm te kan theih miau loh chuan),a nih loh chuan a Krismas ai mahin a phawvuakah ka buai zawk tihna a lo ni dawn si a.Kan chhehvel ringlo mite hian Krismas an lo nghahhleh ve em em ringawt thrin dan a trang hian Krismas kan nghahleh chhan te hi inenfiah a trul te pawh ka ti ve ta zel a nih pek hi...
Chhiar zêl dawn???

November 21, 2009

Sava te takte.

        Tukin zing dar 3:30am (21st Nov' 2009) vel bawr khan khua a lum deuh avangin tukverh ka hawng dar huai a,chutih lai chuan he sava te reuh hi a rawn thlawklut ve hlawl mai.




        Eng sava nge a nih phei zawng ka hre chuang lo a.Engvang khera hetiang zingkar lutuk maia rawn lut a nih chhan pawh hi ka hre chuang lo.Kei lah pek chuan a thla lo laksak phet tumin ka vir buai a.A ti khawp mai a.Rilru tawngtaina nen ngiala ka'n beih pawhin a thla a muang thei tak tak chuang lo a ang khawp mai.bhruaitea hian rannung leh savate a lawm zia leh a khawngaih theih ziate chu han hre chiang se chuan thlamuang takin a awm hle hle mai tur ka ti rilru mai mai a.
        Chutih lai chuan ka rilruah thil pakhat a lo lang ta daih a,hman kum rei tawh deuh hlek a(1993 kum vel ni tain ka hria) kan khaw chhunga sakhi rawn lut kha ka ngaihtuah chhuak ta daih a.Engvang teh reng nge mawni hetianga khawchhunga sa rawn lut hi tihhlum ngei ngei tur tih ang zawng deuh a ngaihdan kan nei tlatin ka hria.Ka lo ngaih ve dan chuan hetianga khawchhung hial rawn lut chin tawh hi chu ramsa dang vanga thlabar leh inhumhimna thlakhleh vang niah ka ngai a,kan lo tanpui a nih lem loh pawhin lo thah emaw lo tih thlabar belh kher kha chu a tha awmlo mange aw ka ti ve a.
        Kan savate chungchangah chuan kir leh ta ila,thlamuang taka a awm theih nan Pathian hnenah te ka dilpui ve ringawt a.Ka muthilhsan zui leh mai bawk nen engtinnge a awm zui zel chu ka hre lo a.Mahse zing dar 6:30am vel bawrah ka muhil tui lai chu a chhuah chak ni fa hmiang,a thlawk kual leh a hram vel nasa-in min tiharh a.Tukverh lamah ka zim phei a,ka chhuahtir leh ta a nih kha..
Chhiar zêl dawn???