SMS Forwarder

       Tunlai chu ka blog ka khawih khât lutuk a, November, mahni pian thla te a lo ni leh ta bawk a,engemawni tal chu han update ve leh zeuh teh ang...hehe..

       Tunlai ka rilru-a awm pakhat, SMS in forward (luih)tir lam pang. Thawkkhat lai deuh a ka SMS dawn:

       "Pathianin ka lo kal leh thuai dawn a ti. He thu hi mi 15 hnenah thawn ang che. Tichuan kar khat chhungin i thil tih tumah hlawhtlinna i chang ang. He thu hi midang hnena i hrilh chhawn loh chuan kum 5 chhung pawhin i thil tih tumah hlawhtlinna i chang thei lo ang. He thu hi St. Thomas church, Kerela atranga rawn kal a ni. Tichuan he thu hi a rang thei ang berin midang hnenah hrilh chhawng ang che. Pathian hai der suh ang che. Pathianin malsawm che rawh se."

       He thu hi ninawm khawp mai hian ka dawng mawlh mawlh mai a, ka thriante leh ka chhungte khan mamawh min ti viau ni ngei tur a ni. Mahse ka han ngaihtuah chiang thrin a, Pathian lokal leh thuai tur thu midang hnena thawn chhuah kha chu a thrat viau rual khan a thu dang rawn ken tel ber khan ka rilru a pawt peng ta daih mai a. Ka dawn tirh takah kha chuan keia hnial hrat ve ta hrim hrim khan min rawn thawn tu apiang hnenah khan "Pathianin ka lo kal leh dawn a ti lo, Lal Isua zawkin a lawm ti", te ka lo ti fiam vel thrin a. A thu dang rawn ken tel ber ka'n ngaihtuah thrin, ka thil dawn hi ka thawn chhuah(forward) leh chuan ka thil tih tumah kâr khat chhungin hlawhtlinna ka chang dawn a ni. Mahse ka SMS dawn hun lai ber kher hi kan exam chawlh lai, engmah han tih tum em em pawh nei chuang lo a ka awm vel mai mai lai ber kher a ni bawk si, thawn chhawng lo ila, kum 5 chhung hlawhtlinna ka chang thei dawn bawk si lo. A awihawm loh em mai han ti dawn ila Pathian hming te lai lai a rawn ri tel bawk si. A va han luhaithlak tehreng em. Ka awihloh em avang chuan "Duh leh Pathian tih tak tak a nih chuan hrem ka ngaih tâk leh min hrem mai rawh se", ti chungin ka thawn chhawng ta lo ngei. Tun thleng hian dam tak chuan ka thil tih tumah hlawhchhamna chu ka la tawng zui ta lemlo chu a nia.

       Hei chauh lo pawh hi hetiang chi SMS hi a Mizo trawng ang te, a Saptrawng ang zawng te pawhin ka dawng hnem ta malh malh khawp mai. "Lal Isua hi i tan leh ka tan a thi a ni. He thu hi zaninah mi 15 hnena i thawn chuan naktuk zingah thu lawmawm tak i dawng ang" tih angreng vel, thawn chhawn a a lawmman thra tak, mahse thawn chhawn loha a hremna na tak tur ang chi hi ka dawng ka dawng leh thrin. Pathian hming meuha rawn thawn a ni thrin bawk si, inthiamlo deuh trung chung hian ka ngaihsaklolui(ignored) vel ta mai mai zel a. Hetiang hi tu pa tho â rilru puak chhuak ngaihtuahna vel nge niang aw ti te'n ka ngaihtuah kual vel ta zel a, chuta ka ngaihtuah chhuah tâk leh midang pawhin lo ngaihtuah ve ula ka tih tâk chu :

1. He SMS hi ka thawn chhawn loh avang hian vanduaina ka chungah a tla dawn kher lo.
2. He SMS ka thawn chhawn avang hian hausakna te,thu lawmawm tak te ka dawn phah dawn bawk hek lo.
3. He SMS ka thawn chhawn avang hian ka currency(balance) hi Cheng khat paw'n a pun phah dawn lo.
4. He SMS ka thawn chhawn avanga hlawkna tel tu chu Service Provider ho bak an ni chuang lo.
5. He SMS hi midang hnenah thawn chhawngin midang rilru nuamlo leh inthiamlo trung turin ka siam dawn lo. Pathian hian ka nunah hetiang em em a thu a rawn sawi duh tak tak chuan, ka Cellphone a rawn hman hma hian kan in kawta hnimbuk te pawh hi a rawn alh ve hluai zawk mahna.
6. He SMS min rawn forward tupa/tunu ngaih ang em em hian ka Mawl leu!!!..

       Aw le, a tawp nan, tuna a chunga point paruk ka rawn pek tâk te hi ngun takin chhiar chhuak vek la, i by-heart vek hnu-ah midang 6 hnenah tal i thawn chhawng dawn nia. I thawn chhawn loh chuan thla dêt leh hmasak berah i kua a thralo hrim hrim ang...ahahhahahahahahhaaha :) :)) :D lOlxxxxx....huhuhu..

Chhiar zêl dawn???

Min Hmangaih Ve Reng Rawh Aw..

Kum 1923 daih tawh kha a ni a. Keichu kum 15 mi lek la niin, he hringnun kawng bumboh takah hian an sawi 'Hmangaihna' hi engang fakaua ropui leh hlu a nih dan tawng chhoa, la hrethiam ve chhawm turin hmachhawp ka nei tran ve êk êk chauh a la ni.

Ka pu:
     Ka pi leh pu, ka pa nu leh pa te nena chengho kan nih avang hian ka pi leh pute hi ka ngaina hle a. A bik takin ka pu nen hian kan inkawmngeih em em a. Ka nausen tetlai atrang tawh a min chhawnchhaih peih em em leh min duat em em thrin tu a ni a. Kei naupang harh ve nafam chu mi pawi lo sawi palh changte alo awmlo theilo a, chutiang dinhmun buaithlak leh khirhkhan tak tak ka tawn chang pawh a ka tlukluhna kulhpui hmasa leh ka humhimna lungpui nghing ngailo chu ka pu ngei chu a ni.
     Tar a nih tawh avanga hnapui thawk thei ta lo chu, in nghaktu ber a ni reng mai a. A in nghahpahte chuan a tupa, naupang khawlai nuamtimi ve tak tan lehkhachaihte lo siamin, tlai ka sikul banah kan in hnunglama zawl zaupui awmah chuan lehkhachaih chu kan chaih dun thrin a. Nuam ka ti thei em em thrin.

Lehkhaphekte:
     Ka pu chuan a kawrchung ipte chhungah hian lehkhaphekte, thil engemaw inziahna hi a dah thra a. Chu lehkhaphek chu a roh em em mai lehnghal. Laksak han tum der chhin mai mai pawh hian kan tihchhiat hlau hian min hauh phah fo reng thrin. Lehkhaphekte mai mai si, chuti fakau maia a roh tak em em mai chu engtak ni ang maw tiin kan inrinsiak laih laih thrin.
     Tukkhat erawh chu ka pu chu nidang anglo tak maiin a lungngaih hmel em em mai a. A hmelah chuan nidanga a hmel hlim sarh thrinte chu a chuai zo a,hlauhthawnna leh lungngaihna hmel a zam ngiai mai a. A hmangaih, a nupui, ka pi, hun engemawchen natnain a tlakbuak tawh, damlo chau tak bulah chuan a thru a. Duat takin a sam te chu a'n chulsak leh hleuh hleuh thrin a. Tichuan a tupa kei ber kher chu min rawn ko a. A bul ka va thlen chuan kei naupang mai chuan han hnem vel vak ngaihna ka hriat si loh avangin a bulah chuan ka'n dingzum zul ringawt phawt a. Chutah a kawrchung uk, hlui lampang tawh tak ipte chu a zen rek rek a, a lehkhaphekte, a roh em em mai chu a rawn phawrh chhuak ta. Chheile!!! Eng thu tak han inthaikawi trial vel ang maw...

Phek ropui thawnthu chu:
     Ka pu chuan a bula thru turin mi han ti a, ka dara min kuah pah chuan,"Bawiha, ila naupang deuh a, tunah chuan ila hrethiam kher rihlo maithei a, mahse engtikah emaw chuan ila rawn hrethiam chho ve mai ang chu", tih pahin chumi lehkhaphekte thawnthu chu 'tiang hian min hrilh ta a:
     "Tlangval hrechho rual ka nih chuan, chhungte thlazar hnuai atranga tal hrang vein, mahni hmakhua ngaihtuahin hna thawh tur ka han zawng ve a. Vanneihthlak deuh maiin kan khuaa pa neinung ve tak pakhat hian a farm enkawltu pakhat atan min la ve hlauh mai a. A hlawh chu tam tham tak nilo mahse mahni puala sum thawkchhuak a, chhungte tibuailo a ka awm thei chu ka lawm tawk ve rih khawp mai.
     Mi te chuan hlawh tamtak neiin eisenloh, an tu leh fate thleng pawha chen dak theihloh khawpa tam sum leh pai an thawkchhuak ngei ang. Kei erawh chuan ka nitin hlawh hi ka nitin hrawk chawm nan hian ka daih tawk trawng trawng a ni chauh si. Chutiangang dinhmuna ding ka nih avang chuan nupui neihte chu a tum hian ka tum ngamlo mai pawh a ni lo, rilru-ina a duhthawi ve deuh takngial pawh hi ka mitsir ngam manglo a ni ber mai.
     A aia thra leh ropui chan leh chuang tur ka hriat loh vang pawh ni fahmiang, ka thawhnaah chuan ka tuichilh em em mai a. Chuvang chuan min ruaitu ka pu te pawh chuan min duhsak ve em em a. Rei vaklo hnuah phei chuan hnathawk dang te enkawl turin,an hotuah hial min siam ta a".

Hmangaihna mak mawi leh duhawm:
     "Kan beisei loh leh rinphak bak hian mihringte chungah hian a thleng ve leh fo thrin a. Ka chungah pawh dan rual lohin a lo thleng ve reng mai. Nikhat chu kan farm neitupa fanu, ramdanga lehkha zira awm alo haw a. An farm chu fan a chak avangin a pa chuan fanpui turin min ti a. Farm a rawn thleng a, chu nula ka han hmu chiah chu....chheirawle!!! a va han hmelthra chungchuang ngai tak em. A vun rawng ngo no set mai leh a bahsam rangkachak rawng inkap eng sat te chu ava han inchawih ngai tak em. Chumai a ni 'nem. A heh, Rose par sen lar ang mai a sen hlar mai leh a mitmeng dumpawl riai mai han hmuh ringawt mai pawh chuan, ramchhuak chhawlhalin luite tuithiang tak mai an hmu ang maiin hringnun tuihal a thawi dam nghal sawng sawng mai. 'Love at first sight' tihte hi a awm ka lo rin ngailoh avang ringawt te chuan ka inthiamlo lek lek ta mai.
     Farm kan fan chhung zawng pawh chuan thildang ka ngaihtuah thei tawh lo. Mit tlalo lekin amah bawk chu ka lo melh leh vawng vawng thrin. Ka thinlung mit phei hi chu a pawng zawrh zawrh a ni ber mai. Ka thinlung zawng zawng hian ka duhin ka ngaizawng nghal ta em em mai a. Rilruah ngaihtuahna hrang hrang a rawn lut nghal. Aw, rem nise, hmangaih biahthu han hlan a, duh tak maia han pawm a, han kuah a, han fawh vawng vawng....aaa.... hrawk bawk dawk zawk khawpa han fawh ngawih ngawih mai te pawh a chakawm rum rum mai a lawm le. Kei ka tan zawng cho zawh rual a ni si lo, engtinnge ka tih ang? Tihngaihna dang vak keia dinhmun atrang hi chuan ka hre si lo. Englekhawle, chunglamah Engkimtithei a awm alawm maw le. Dil leh chawt phawt mai teh ang.
     Lalhmelthra-i chu farm lam ngaina mi tak a nih avangin farm chu a rawn tlawh ve fo a. Hun rei vaklo hnu chuan kei nen pawh chuan kan innel chho ve hle tawh a. A hmel a thrat tluk bawkin a rilru pawh thra tak a ni. Farm a rawn kal changte chuan a titi siam siam reng a. Kei phei chuan ka ngaina satliah mai pawh a ni lo, ka ngaizawng takzet tawh mai. Nghalchang kawlh tai a hlawh tur pawh ni se ka ngam zan ang. Min tai duhlo a nih pawhin keimah talin ka va tai tralh duh hial ta ve ang.
     Ka duh em avang chuan Pathian hnenah pawh ka dil awl lo mai. Thla tam pawh a la ral hman lo, ka dilna chhanna duhawm chu a rawn thleng ta der mai. Tlaikhat chu farm-a tlai ni nema kan pahniha kan lenkhawthawn vel mai mai lai chuan, a ding a, ka mitah tak min melh sat pah hian, thutak deuh maiin a rilru-a ka awm reng thrin thu leh min duhzia min hrilh ta tlat mai a nih kha!!! Farm a rawn tlawh ngun em em chhan te pawh keimah vang liau liau a ni tih min han hrilh mai te phei chu, ka mithmuh leh benghriat te chuan rinhlehna ramah min hruailut thei rum rum dawn a lawm le. Mahse han awihloh phal chi ziazang ni hek lo. Ka lawm lutuk chuan hnuk ulh treuh a "Jakoba Peter" han tih tuarh mai te ka chak rum rum hman a, mahse awmzia a neih loh avangin ka insum leh hram hram. Ka awihloh lutuk avanga awih zawk nge ka nih a, ka awih lutuk avanga awih lo zawk ka nih pawh ka hrethiam chiah lo. Ka lawm em em  a ni tawp mai.

Hmangaihna lamtluang bumboh:
     Fairy Tales anga 'Tichuan hlimtakin an awm kumkhua ta a' tih anga tawp mai tura ka duh em em lai chuan, thil duhawmlo zet mai, mumang ram lamah pawh ka la duh chhin ngai miahloh tur thil a rawn thleng leh ta tlat. Chutia kan han inkawm nasat deuh hnu chuan le tlema mi chawhnu deuh tan lo chuan kan pahnih inkara inzawmna awm chu hairual ni ta hek lo, a nu leh pa te pawh chuan an lo hre ve ta. An lawm miah lo zui lehnghal. A pa phei chuan makpa atan Doctor emaw Officer neinung deuhte a lo beisei ve ran ran lai a chutia a fanu rangkachakin a huanpu mai a lo tleipui reuh chu a ngaihdan a pel viau ni ngei tur a ni, kan inngaizawng tih a hriat atrang chuan kei min hmuh chu a khapsak ta bur nghal mai. Keiin ka hna ka chan phah bawk.
     Chutia kan inhmuh hleihtheih tak si lohah chuan khua hi a har ngawih ngawih mai a. Tlaikhat chu a chhungte hriatlohin a rawn chhuak ru a, kan in lamah a rawn kal a. Kan han inhmu chiah chu kan inngai ngang bawk a, lawm avang hian mittui a luang zawih zawih thei. Kan han inpawm vawng vawng phawt a. A chhungten kan inhmuh an remtih si loh avangin kan hmalam hun tur relin kan han Committee nghal a. Mi pahnih, duh thuhmun Committee kan ni bawk a, kan agenda 'Tlandun' chu kar loah kan rel thlu nghal thuai mai a. Kan tlandun dan tur chu kan rel leh nghal a. Kan khaw daia Forestation Department ho Fartruah hmunah chuan kan innghak dun anga, chutah kan khaw threnawm hnaiber khua kan pan ang. Chutah chuan kan innei anga, tichuan tuma tihbuai tawh loh turin hlim takin kan awmdun tawh dawn a ni.

Phek ropuia thu inziak chu:
     Tichuan chak angreng tak si, huphurh ru deuh bawk siin kan ruatlawk ni-ah chuan kan intiamna hmun chu ka va pan ta a. Mahse ka va thlen chuan ka tiampuinu-i reng hmuhtur a lo awm lo mai. Ka rilru beidawng ka hawi vel ruai lai chuan ka piah hret Fartruah kung upa ve tawh takah chuan lehkha lo inkilhbet vau vau ka va hmu hlauh a. Ka pan phei a, ka'n pawtthla a. Ka chhiar nghal. Ka hmangaihi, helai hmuna ka tiampui thuziah ngei mai a lo ni. Hetiang hian a lo ziak a:
     'Ka duhlai, kan tiam hmun chu kei aia ilo va thleng hmasa a nih pawhin,
      Lo beidawng lo hram ang che aw.
      Hna chhete tih zawh lawk tur ka la nei a;
      Engtianga rei nge a nih dawn erawh ka hre lo.
      Mahsela englaimahin ka thlauthla ngailo ang che.
      Intawn leh hma zawng leh hlimtaka kan lendun thlengin,
      Keichuan ka hmangaih reng fo ang che.
      Nangpaw'n Min Hmangaih Ve Reng Rawh Aw.'  ..."

Thawnthu ropui tawpna chu:
     Khi thu ropui khi ka chhiarna chu ka pi boral hma darkar khat kalta lek kha a ni a. Khatia an tlandun hnu khan inneiin, chhungkaw hlimtak an dinchho dun a. Inhmangaih leh inngai em em rengin tar tak thlengin an dam dun a. Mahse hun engemawti atrang khan ka pi hriselna chu a thralo chho ta angreng a. Damdawiin lamah te kan inenkawl fe hnuah, inlamah kan insuan leh a. Thla thum vel zet natna khuma a beh hnu chuan, ka pu-in he khawvela a hmangaihber mai leh keini, a tu leh faten kan ngaih em em mai chuan chatuan ram min lo pansan ta.
     Ka pi vui ni chuan Biakin lamah kan kalkhawm a. Ka pu hi mi inti pachang thei mi zet mai a nih avang hian kum sawm leh panga ka nih chhung hian a mittui tla hi vawitekhat pawh ka la hmu chhin ngai lo. Mahse hemi ni zet hi zawng, hringfate doral trihbaiawm tak 'THIHNA'-in a hmangaih a hnehchhuh ni a ni tlat a, ka pu mittui chu dan rualloh hian a sur zung zung mai. Biakin kawngkapui kianga trawngtraina hmun an siamah reilote kan trawngtrai hnu a ka pu-in ka pi hnena a thuchah hnuhnungber leh rinawmna thutiam a sawi lai chuan mittui sur lo reng kan awm lo:
     'Ka duhlai, kan tiam hmun chu kei aia ilo va thleng hmasa a nih pawhin,
      Lo beidawng lo hram ang che aw.
      Hna chhete tih zawh lawk tur ka la nei a;
      Engtianga rei nge a nih dawn erawh ka hre lo.
      Mahsela englaimahin ka thlauthla ngailo ang che.
      Intawn leh hma zawng leh hlimtaka kan lendun thlengin,
      Keichuan ka hmangaih reng fo ang che.
      Nangpaw'n Min Hmangaih Ve Reng Rawh Aw...'

Chhiar zêl dawn???

Sahmulphah thla lunglen..(November Special)

(Sahmulphah thla,ka pianchampha phâk thla a ni bawk a,a pualin lung te han tilêng ve leh hmiah ila.)

    Favang hunpui Mim Kut leh Khuangchawi thlaten min liamsan ta a.Zing han tho ila Zoram lamah chuan ruam tin leh kawr tin mai chu triauchhumin a bawh var chuk tawh mai a.Zing dai tlain tukverh darthlalang alo bawh paw chuk mai a,phul leh hnim hringte alo bawh thlan dap mai bawk a.Tlangsam leh JapanHlo an lo par vul chuk tawh mai hi chuan mi a hluana lungleng mi ta nafam chu nunhlui min ngaihtirtu an lo chang leh mai thrin si a le.

   Naupan zuallai atrangin tran ang aw: Thla tir lam kha chuan zirlai exam hun a hnaih tlangpui thrin avangin lehkha kha kan zir ngawrh ve viau thrin a.Zan lamah paten,"Dar 8:30pm thleng zir la,chuan i mu dawn nia", an han tih kha chuan zirlai lam ai mahin sana khan rilru a luah tawh zawk mai thrin a.
   Kan zirtirtute ho pawh kha an lo felin an lo taima thrin ngawt mai.Home Visit te kha an rawn nei ve ziah a.Zirtirtuten an rawn thlawh kha chuan inlak mark thrat kha kan han tum ve thei em em ringawt a.Kan lehkha han zir dan te reng reng kha,kawmthlang naupang teho aia chhiar rin ringawt kan han tum ta thrin.Nuten min han fuih a,"Chu i thriante pawh an chhiar rin em chu", an han tih kha chuan a au-a au tak meuh meuh khan kan thil by-heart turte kha kan han chhiar ta thrin a.

   Study camp: Tette atranga khawi dang awm bo ngai ta hek lo,Cl-VI kan nih trum PSLC kan exam hmaa study camp kan neih kha ka awm bo hmasakna ber a lo ni reng a.Awmbo han tih takah kan sikul kha chu kan in atranga hla lote a ni tho a,mahse ka lung kha a leng thei khawp mai.Hemi kan camp trum hian zankhat chu ka tho a-in tukverh kha zunin emaw tiin zun ka lo tum tlat a ni awm a,thriante ho min buaipui laih laih zarah kan zung ta lo vel hram kha a ni awm a.Cl-VII kan nih khan MSLC exam hma khan kan camp leh a,mahse hemi trum hi chuan tlemin kan lo lian ve deuh tawh bawk a,in lam ngaih khawhar lutuk kha chu a awm twh lem lo.Kan sikul awmna kha a ramhnuai deuh bawk nen sihal kha an tam khawp a,kan chawthring paihte kha an rawn ei thrin a.Zankhat pitar thih truma MUP hoin darkhuang an han vaw ri bul bula,sihal an han u chuah chuah maite kha chu naupang riakkhawm ta nafam chuan kan han hlau khawp lehnghal a.Tukverh darthlalang keh bula ka mu zet phei kha chu mut a tui duh lem lo khawp mai.

   Exam: Inchhuan thu hla suhah mahni pawla a tithra ber pawl han nih chhoh ve thrin takah kha chuan exam na na na kha chu ka huphurh lo ve thrin khawp mai a.'marawhchu tunhma ka ngaihtuah let leh hian kan lehkha zir dan thrin kha alo quality lemlo khawpin ka hria.Thingtlangah Mizo medium-a kal tih takah saptrawng te kha chuan rilru kha a chawkbuai phalo ve ngawih ngawih thrin bawk lah tak a.English subject te kha chu kan nei ve ngei,note-ah pawh bazar note kan han hmang a.Bazar note-ah khan answers ho te kha a tawi thei anga an kaihtawi tawh a ni tih lam ngaihtuah lek lo khan kan duhna lai berah kan han rek bung ve leh hmiah mai thrin a.Zirtirtute pawh kha an lo fel ngawt mai,mark te kha min lo pe ve leh zel thrin a.
   'A baby saw a pen,he picked up quickly' tih mizotrawnga lehlin kan han tum ve trum te kha a sin.'A baby' tih chu naute tihna a ni tih chu kan hre ve lutuk.'Pen' pawh kan hria,mahse 'saw' laitakah khan kan buai ta.JF-a dictionary kan han rawn ve ngial a,'saw' chu 'thingzaina-a zai' tiin alo awm si,awih bik vak chuang lemlo khan 'tiang hian kan han chhuah pum ve hram chu a nih kha - 'Naute-in thingzaina-in pen a zai a,rang takin a la kang a'.
   Essay writing mawlh maite kha,kan English Grammar bu-a awm ang chiah chiah khan kan han by-heart a.A bak tih leh ngaihna chuang pawh kan hre lo.'A Cow' tihte,'My Best Friend' tih vel hmang te kha chuan essay pawh kha thui deuh deuh pawh khan kan ziak ve thei.Mahse khatiang ni lo,thupui(topic) dang daihin essay ziahtur an rawn tichhuak ang tih kha ka hlau leh hnuhnawh thrin.'Mahatma Gandhi has four legs and a very straight and big ears' te kan tih mai zawngin khua a var dawn lo mep mep em a sin.fuihpawrh te reng kha kan lo nuam thrin awm ka ti.PSLC kan exam trum khan drawing-ah arpa lem ziahtur a rawn chhuak a.Min vengtu te khan,"Lianpui puia ziah tur,a ziak lian lianin mark an hmu thra ang", an tih avang khan kan ziak lian tlang bawk a niang ka bula thru,sikul dang ami phei kha chuan arpa mei leh a ke vel kha answer paper-ah khan a ziak leng ve ta lo.Mark engzah tak hmu ta ang maw.


   Exam zawh: A zir laia kan lo ngahhleh em em thrin Exam zawh kha November thla chawhnu lam kha a ni tlangpui a."Exam zawh chuan ka mu rei thei tawh viau ang" tia kan lo iak kan lo iak ve te zawng kha chu 'khawi lamah' hi a ni ta ringawt.Exam zawh tukzing atrangin kan insawi phur a,exer te kan han la ve ringawt a.zing hma lutuk tak maiah torch light nen exer la tur khan kan han insawmkhawm ve bawk a,khawi hmundanga tlan ta chuang lemlo khan khaw daia Pioneer(Midum) camp-ah bawk khan kan tawi kan tawi a,an atta kan kha kan han dil leh ngawt mai zel a.Atta kha min han sem dan dan a,pakhat aia tam kan han dawn changte phei kha chuan kan intithei ve larh larh viau zel thrin.
   Chhun lam kha chuan tihtur dang tam heklo le Mat luiah te khan kan han kal ve leh ngawt mai zel a.Ka lui kal ve ang hu ai hian tui ka thiam theilo hi mak ka ti thrin.Mite chu tuiah chuan sangha ang hlauh an ni thrin a ni ngai a,keive erawh zawng sangha thi  ang hlauh ka ni mai.Mahse kahpuk(kahpup) siam kher kherah kha chuan ka inla master ve chiang a lawm.Maubul chhah thra deuh,kaw zuih trat mai kan han sat a,a mu atan phaktel emaw neem rah emaw kan hmang a.Ka kahpuk kha chu a puak ring pawl a ni ve ziah thrin.


   Tunah chuan: Duhaiin a thui dawn mah mah ta tlat mai.December - Pawlkut thla te kan ziak thleng lek lek hman a lawm le.Naupan laia kan bazar note hman dan ang deuhin duhna lai berah han pawt chat leh hmiah ila ni mai.Tunah zawng Vairampur-ah,ruam leh kawrte zingkara triauchhumin a khuh tur awm ve reng reng lohna hmunah truan kan rel ta si.Sahmulphah thla lunglen pawh nunhlui leh pianna Zoram ngaih nana kan hman tak mai loh nakah...


"Naktuk Krismassssss.................kan tih lai te kha".......

Chhiar zêl dawn???